ශ්‍රි ලංකාවේ භාවිතා වන භාෂා දෙකකි. මින් සිංහල භාෂාව සංඛ්‍යාවෙන් බහුතර අයගේ භාෂාව වන අතර දෙමළ භාෂාව සංඛ්‍යාවෙන් සුළුතර අයගේ භාෂාව වේ. මින් සිංහල භාෂාව ආධිපත්‍යය දැරීම පිළිබද අමිහිරි අත්දැකීම් රටේ ඉතිහාසයේ ඇත, වර්ථමානයේද නැත්තා නොවේ. සිංහල වේවා දෙමළ වේවා ශුද්ධාත්ම අනාවරණය “ඔවුන් එකිනෙකාට තම තමන්ගේ මවු බසින් තේරුම් ගත හැකි” වන ලෙස ජනතාවගේ සවනට ලක්විය යුතුය. ශුද්ධාත්ම පණිවිඩය අනාවරණය කරන අයගේ වගකීම එසේ විය යුතුය.

ශුද්ධාත්ම මංගල දිනය 

දේව රාජ්‍යය සදහා කැපවීම අභියෝගාත්මක කාර්‍යභාරයකි. එහිදි දේව රාජ්‍යයට ප්‍රතිපක්ෂ මෙලෝ බලවතුන්ට හා ඔවුන්ගේ දේශපාලන, මුල්‍යමය, හමුදාමය, නීතිමය වැනි වූ විවිධ බල අධිකාරි ව්‍යුහයන් වලට, දේව රාජ්‍යය සදහා කැපවන අයට මුහුණ දීමට සිදුවේ.

ජේසු ස්වාමින් වහන්සේටත් එය එසේම විය. එම අභියෝගයට උන්වහන්සේ මුහුණ දුන්නේ ශුද්ධාත්මානුභාවයෙනි, දේව තාත්තාගේ බලශක්තිය‍ෙණි. උන්වහන්සේ, දේව රාජ්‍යය සදහා වූ තම දූත මෙහෙවර ආරම්භ කරමින් ජොර්දාන් නදියේ ස්නාවක ජුවාම් තුමාගෙන් බව්තිස්මය ලබන විට ශූද්ධාත්මයාණෝ උන්වහන්සේ මත වැඩම කළ බව සුභාරංචිය සදහන් කරයි. එමෙන්ම  ඉක්බිති “ජේසුස් වහන්සේ යක්ෂයා විසින් පරික්ෂා කරනු ලබන පිණිස ශුද්ධාත්මයාණන් විසින් පාළුකරයට පමුණුවනු ලැබූ” බව ද සුභාරංචිය සදහන් කරයි. මෙයින් අපට පැහැදිලි වනුයේ ජේසුස් වහන්සේ ව දේව රාජ්‍යය ගොඩ නැගීම සදහා මෙහෙය වන ලද බලවේගය වූයේ දෙවියන්වහන්සේගේ ආත්මයාණන් බවයි.

ඒනිසාම තමන්ගේ අපෝස්තුළුවරු ද උන්වහන්සේගේ දූත මෙහෙවර තවදුරටත් මෙලොව ඉදිරියට කරගෙන යාම සදහා ඔවුන්ව මෙහෙයවීමට හා බලගැන්වීමට ඔවුන්ව  ශුද්ධාත්මයාණන්ට විවෘත කිරීමට උන්වහන්සේ කටයුතු කළ සේක.

දේව රාජ්‍යය සදහා කැපවීමට වර්තමානයේ යමෙක් ක්‍රියාකාරී වන්නේ නම් ඔහු හෝ ඇය ද ශුද්ධාත්ම මෙහෙය වීමට හා බලගැන්වීමට නතුවීම සිදුවිය යුතුය.

බොහෝ විට අප සිතන්නේ ශුද්ධාත්ම වරම් අපට අවශ්‍ය වනුයේ පාසල ආරම්භ කරන විට, විභාගයකට මුහුණ දෙන විට යනාදි අවස්ථා වලදි බවය. බොහෝ කතෝලිකයෝ ශුද්ධාත්මයාණන්ට වඩා උන්වහන්සේ විසින් මෙහෙය වනු ලැබූ සාන්තුවරයනට සමීපය. එයට හොදම නිදසුන වනුයේ ශ්‍රි ලංකාවේ ශුද්ධාත්මයාණන්ට කැප කර ඇති දෙව්මැදුරු ඇත්තේ දෙක තුනක් පමණක් වීමයි.

බොහෝ වෙලාවට එය එසේ සිදු වී ඇත්තේ බොහෝ කතෝලිකයෝ දේව රාජ්‍යය ගොඩනැගීමේ කාර්‍යභාරයේ තීරණාත්මකව නොයෙදන බැවින් ඔවුන්ට ශුද්ධාත්මයාණන්ගේ අවශ්‍යතාවයව දැඩිව නොදැනෙනවා නිසා වෙන්නට පුළුවන. එමනිසා දේවරාජ්‍යය මෙලොව ගොඩනැගීමේ දූත මෙහෙවරේ ඔබ තීරණාත්මකව යෙදෙන්නේ නම් ශුද්ධාත්මයාණන්, බිය සැක ඔබෙන් දුරු කර මුහුණ දීමට සිදුවන අභියෝග වලට ශක්තිමත්ව මුහුණ දීමට ඔබව මෙහෙය වනු ලබන බව කිතුනුවෙක් ලෙස ඔබ විශ්වාස කළ යුතුය. එම දිව්‍යමය සම්පත මත අපි යැපෙන්නේද? උන්වහන්සේට කොතෙක් දුරට අප ජීවිතයේ විවෘතභාවයක් ඇත්ද?

ශුද්ධාත්ම බලයෙන් ශක්තිමත් වූ අපෝස්තුළුවරු දේශනා කිරීමට පටන් ගත් විට පෙන්තකොස්ත මංගල්‍යයට විවිධ දේශ වලින් පැමිණි සිටි විවිධ භාෂා කතා කරන්නන්ට “එම කතා තම තමන්ගේ මවු බසින් තේරුම් ගත හැකි ලෙස ඇසුණෙන් ඔවුහු වික්ෂිප්ත වූ” බව ක්‍රියා පොත සදහන් කරයි.

එවකට රෝම අධිරාජ්‍යයේ භාෂාව අනිකුත් සියලුම භාෂා වලට වඩා උසස් ලෙස සලකනු ලැබීය. භාෂාමය ආධිපත්‍යයක් එම සමාජය තුළ විය. එවැනි පරිසරයක ශුද්ධාත්ම එළිදරව්ව භාෂාමය ආධිපත්‍යය පරාජය කරමින් සැම භාෂාවක්ම සම තත්ත්වයේ ලා සලකනු ලැබීම මෙහිදි විද්‍යාමාන වේ. ශුද්ධාත්ම භාෂාව අවබෝධ කර ගැනීමට සමාජයේ උසස්ම ලෙස සලකනු ලැබූ අධිරාජ්‍යයාගේ භාෂාව දැන ගැනීම අවශ්‍ය නොවීය. ඒ සදහා තමන්ගේම භාෂාව ප්‍රමාණවත් විය.

ශුද්ධාත්ම මෙහෙයවීමට නතු වී දේව රාජ්‍යය වෙනුවෙන් කැපවන්නන්ට ජාතිමය හා භාෂාමය වැනි ආධිපත්‍යයන් හා භේදයන් සැලකිය නොහැක. ශුද්ධාත්ම අනාවරණය නිවැරදිව අවබෝධ කරගැනීමට හැකිවනුයේ එවිට පමණි.

ශ්‍රි ලංකාවේ භාවිතා වන භාෂා දෙකකි. මින් සිංහල භාෂාව සංඛ්‍යාවෙන් බහුතර අයගේ භාෂාව වන අතර දෙමළ භාෂාව සංඛ්‍යාවෙන් සුළුතර අයගේ භාෂාව වේ. මින් සිංහල භාෂාව ආධිපත්‍යය දැරීම පිළිබද අමිහිරි අත්දැකීම් රටේ ඉතිහාසයේ ඇත, වර්ථමානයේද නැත්තා නොවේ. සිංහල වේවා දෙමළ වේවා ශුද්ධාත්ම අනාවරණය “ඔවුන් එකිනෙකාට තම තමන්ගේ මවු බසින් තේරුම් ගත හැකි” වන ලෙස ජනතාවගේ සවනට ලක්විය යුතුය. ශුද්ධාත්ම පණිවිඩය අනාවරණය කරන අයගේ වගකීම එසේ විය යුතුය.

එහෙත් අපෝස්තුළුවරුන්ව වර්ථමානයේ නිල වශයෙන් නියෝජනය කරන  රදගුරුවරුන්ගෙන් ශුද්ධාත්ම මග පෙන්වීම තුළ අප රටේ සිංහල හා දෙමළ ජනතාව අමතා “ඔවුන්ගේ මව් බසින් තේරුම් ගත හැකි” එක් පණිවිඩයක් නිකුත් නොවන අවස්ථා සමහර විට දකින්නට ලැබේ. ඊට හොදම නිදසුන නම් මෑතකදි නිකුත්වූ මැයි 18 දින තිස් වසරක යුද්ධයෙන් මියැදුනු අය සිහිකර යදින ලෙස උතුරු නැගෙනහිර දෙමළ රදගුරුවරු එම පෙදෙස්වල ජනතාව අමතා කරන ලද ප්‍රකාශයයි. මෙම ප්‍රකාශයට සිංහල රදගුරුවරු එක්ව සමස්ථ කතෝලික රදගුරු සම්මේලනයේ පණිවිඩයක් ලෙස එය නිකුත් නොවුයේ මන්ද?

අප්‍රියෙල් 21 පාස්කු ඉරුදින සිදුවූ ඝාතණය ගැන සිංහල දෙමළ භාෂා කතා කරන රදගුරුවරුගෙන් සැදුම් ලත් සමස්ථ රදගුරු මණ්ඩලය සිංහල දෙමළ  භාෂා කතා කරන්නන් අමතා ආමන්ත්‍රණය කරන විට මැයි 18 යුද්ධයෙන් මියැදුනු අය සිහිකරන දිනය ගැන දෙමළ භාෂාව කතා කරන රදගුරුවරු පමණක් දෙමළ භාෂාව කතා කරන උතුරු නැගෙනහිර දෙමළ ජනතාව අමතා කතා කිරීම අප අවබෝධ කළ ගත යුතු වනුයේ කෙසේද? කොහේ හෝ වැරදීමක් මෙහි සිදුවී නැත්ද? එකම ශුද්ධාත්මයාණන්ව අප අදහන්නේ නම් ශුද්ධාත්ම ආගමනයේදි සිදු වූ ලෙස ශ්‍රි ලංකාවේ සිංහල දෙමළ භාෂා කතා කරන සියල්ලන්ව අමතා යුද්ධයෙන් මියැදුනු අය ගැන සමස්ථ රදගුරු මණ්ඩලය එක් පණිවිඩයක් දිය යුතුව තිබුණා නොවේද?

‘අප්‍රියෙල් 21’ හා ‘මැයි 18’ අතර මේ වෙනස ඇයි? එය එසේ වන්නේ ශ්‍රි ලංකාවේ රදගුරුතුමන්ලාව මෙහෙය වන්නේ පාවුළු තුමා පවසන පරිදි “විවිධාකාර දීමනා ඇතත් (සිටින) එකම ශුද්ධාත්මයාණන්” නොවීමද? සමස්ථ රදගුරු මණ්ඩලයක් ලෙස යුද්ධයෙන් මියැදුනු අය ගැන එකට එක්ව සිංහල දෙමළ සමස්ථ ජනතාව ආමන්ත්‍රණය කිරීමක් නොවන්නේ රටේ ක්‍රියාත්මක වන  ජාතිමය හා භාෂාමය ආධිපත්‍යයේ අශුද්ධාත්මයාණන් රදගුරු මණ්ඩලය තුළ ද ක්‍රියාත්මක වන බැවින්ද?  උතුරු නැගෙනහිර පදවි වල රදගුරුවරුන් සමග සිංහල රදගුරුවරු  එක් නොවී නිහඩවීමෙන්, දෙනු ලබන නිශේධාත්මක පණිවිඩයක් ඇත. එම පණිවිඩය  ශ්‍රි ලංකාවේ සිංහල හා දෙමළ කතෝලික ජනතාව ගනු ලබන්නේ එක් පණිවිඩයක් ලෙස නොව පරස්පර විරෝධි පණිවිඩ දෙකක් ලෙසය. එක් පණිවිඩයක් පමණක් විවිධ භාෂා කතා කරන්නන්ට ඒ ඒ අයගේ භාෂාවෙන් අවබෝධ කර ගන්නට අපෝස්තුළුවරු මගින් ප්‍රකාශයට පත් කළ ශුද්ධාත්මයාණන්ගෙන් පරස්පර විරෝධි පණිවිඩ දෙකක් කෙසේ ගලා එත්ද?  සමාජයේ ක්‍රියාත්මක වන අශුද්ධාත්ම බලවේග පරදවා සැමවිට ශුද්ධාත්ම බලවේගයට පමණක් ජීවිතයේ ඉඩ දෙමු.

7GradeWriterWorkshopශෙරාඩ් ජයවර්ධන පියතුමා

Jesustoday.lk 5 වන වසර 12 වන සතිය 2021 මැයි 23 වන ඉරිදා

 

 

Comments powered by CComment